Rusiya Elmlər Akademiyasının akademiki, tibb elmləri doktoru Armais Kamalov koronavirus infeksiyasının digər xəstəliklərdən fərqlənməsini və həddən artıq yoluxucu olmasını izah edib.
Rusiya mətbuatı xəbər verir ki, akademik infeksiyanın oxşar tənəffüs xəstəliklərindən çox fərqləndiyini qeyd edib.
Onun sözlərinə görə, həkimlər hələ də bəzi xəstələrin bir neçə gün yüksək hərarətdən sonra tez sağalmasının, digərlərində isə xəstəliyin uğurlu müalicə kursundan bir müddət sonra virusun kəskinləşdiyinin səbəblərini başa düşmür.
"Bu infeksiya elm adamları və həkimləri sanki çarxa salıb. Artıq bunu başa düşməyə və hiss etməyə başlayırıq. Xroniki xəstəliklərin olması və immun sisteminin vəziyyəti xəstəliyin gedişatına təsir edir”, - deyə Armais Kamalov bildirib.
Ekspert qeyd edib ki, güclü immunitet bir növ insanın daxili pasportudur: "Şəkərli diabet, ürək və damar xəstəlikləri, bronxlar və ağciyər xəstəlikləri olan xəstələr risk altındadır, ancaq koronavirusun necə davranacağını təxmin etmək hələ də çətindir. Bu, onun əsas və ən təhlükəli xüsusiyyətidir. Çoxunda xəstəlik yüngül keçir. Və düşünürsən ki, bu xəstəlik niyə bu qədər qorxuludur? Digərlərində çox sürətlə irəliləməyə və ağciyər toxumasına təsir göstərməyə başlayır. Bu da həkim personalında bir çox suallar doğurur. Həkimlər müalicəni hər bir xəstə üçün fərdi olaraq təyin edir”.