capar.info : - Məlumdur ki, bütün dünyada koronavirus pandemiyasına qarşı xüsusi karantin rejimi tətbiq edilir, böyük ticarət mərkəzləri, ictimai-iaşə obyektləri fəalaiyyətini dayandırıb.
Təbii olaraq Azərbaycanda da ciddi karantin rejimi mövcuddur.
Ancaq deyəsən bütün bunların, “Sədərək Yusifə” zərrə qədər dəxli yoxdur.
Söhbət Qafqazın ən böyük ticarət mərkəzlərindən biri olan “Sədərək” Ticarət Mərkəzinin sahibi Yusif Qədimovdan gedir.
Görəsən, Yusif Qədimov üçün bu ölkənin qanunları, qaydaları keçərli deyil ?
Niyə karantin qaydalarına əməl etmir ?
Adamın oğlu Prezident Administrasiyasında işləyəndə noolar ?
Adamın “patron”u Ramiz Mehdiyev olanda məgər adam ölkə qanunlarını ayaq altına atar ?
Həm də nəzərə alsaq ki, artıq Yusif Qədimovun “patron”u xeyli vaxtdır “nəm çəkib”, daha atmır…
Bəs, Yusif Qədimovu arxayın salan nədir ?
Sözün qısası, bu məchul suallara cavab axtarmaqdansa, gəlin özümüz “Sədərək”ə baş çəkək, görək orada nələr baş verir ?
Deməli, ciddi karantin qaydalarına baxmayaraq “Sədərək” Ticarət Mərkəzinə girişdə heç bir yoxlama-filan yoxdur.
Amma içəri daxil olan kimi əynində heç bir xüsusi geyim forması olmayan şəxslər başının üstünü alaraq COVİD pasportu tələb edir. Bu toydan sonra nağara söhbətinə oxşayır. Nə üçün mərkəzə daxil olanda deyil, içəridə yoxlayırlar ?
Amma buna baxmayaraq bu yaxınlarda Ticarət Mərkəzinin mühafizəyə məsul şəxsləri telekanallardan birinə müsahibə verərək bildirib ki, “Sədərək”də mühafizə ilə bağlı heç bir problem yoxdur.
Problemin buynuzu olur, yoldaş Qədimov ?
Deməli, “Sədərək”ə girişin qiyməti 50 qəpikdir, 50 qəpiyini ver, keç, heç karonavirus-zad sorğu-sualı, covid pasportu-masportu soruşan yoxdur.Elə ki, 50 qəpiyini verib içəri keçdin, başının üstün qırğı kimi alırlar və cərimələr başlayır.
Cərimələri də kim ödəsə yaxşıdır?
Əlbəttə, mağaza sahibləri.
Niyə ?
Sən vətəndaşın 50 qəpiyini alıb yoxlamadan içəri buraxırsan, sonrasa mağaza sahiblərini cərimə edirsən.
Yusif Qədimov deyəsən əla qazanc mənbəyi tapıb. Bütün ağırlıq mağaza sahiblərinin, icarədarların üzərinə düşüb.
Adama deyərlər ki, neçə ildir icarədarların hesabına milyonlar qazanmısan, bu gün, yəni karantin dövründə onlara niyə az da olsa güzəşt etmirsən ?
Karantin dövründə Sədərək Yusif mağaza sahiblərindən artıqlaması ilə kirayə-icarə haqqını alıb. Güzəşt-zad yoxdur.
Vergi məsələsində də Yusif Qədimov öz qaydalarını tətbiq edir. Mağaza sahiblərindən vergi adı ilə pul yığırlar.
“Sədərək”də 1 kv.m üçün yer haqqı 60 manatdan 150 manatadək artır.
Ticarət Mərkəzindəki icarə, vergi və digər pulları Yusifin bacısı oğlu Hacı Rasim yığır.
Yusif Qədimov təkcə “Sədərək”dən yığdığı pullarla Buzovnanın yarısını alıb. Hətta “Araz” marketin Buzovnadakı filialının binası da Yusif Qədimova məxsusdur.
“Sədərək” Ticarət Mərkəzinin “genel direktoru” Vaqif müəllim isə başqa aləmdir. Onun qəbuluna düşmək üçün gərək 3 qat “oxrana”dan keçəsən. Heç Hondurasın baş nazirini belə qorumurlar.
Deməli, mağazalar icarə haqqını 10 dəqiqə gecikdirən kimi “qoçular” mağazanı “plomb”layır, güzəşt-zad ola bilməz.
Bir neçə vacib sualla yazını yekunlaşdırırıq. Yəqin ki, növbəti yazılarda bu suallara cavab tapmağa çalışacağıq.
Mühafizə xidməti Mərkəzə daxil olanları niyə girişdə deyil, mağazaların içərisində yoxlayır ?
Vergi Xidməti niyə vergini sahibkarların, mağaza sahiblərinin özündən yığmır ?
Niyə sahibkarların ödəməli olduğu vergini Yusif Qədimov yığır ? //gundelik-baku.com//