Rusiyanın Çelyabinsk vilayətində Federal Təhlükəsizlik Xidmətinin regional idarəsinin əməkdaşları şəhər yol polisi idarəsinə rəhbərlik edən Aleksandr Qaydeni saxlayıblar.

Capar.info - yerli KİV-ə istinadla bildirir ki, yol polisi idarəsinin keçmiş rəisi ilə birlikdə təhlükəsizlik qüvvələri “Kapitalstroy” tikinti şirkətinin təsisçisi Romik Vardanyanı saxlayıb.

İstintaqın məlumatına görə, Qayde vəzifə səlahiyyətlərindən sui-istifadə və rüşvət almaqda şübhəli bilinir. Vardanyan da öz növbəsində rüşvət verməkdə ittiham olunur. 2018-ci ildən 2023-cü ilə qədər Qayde yol sektorunda fəaliyyətini “qoruduğuna” görə bir iş adamından 1 milyon rubldan çox rüşvət alıb.
Xüsusilə, rəisin Çelyabinsk küçələri ilə yük daşımalarının fəaliyyətindəki pozuntulara göz yumması müəyyən edilib.

Həmçinin bildirilib ki, polis puldan əlavə, kənar şəxslər vasitəsilə rüşvət qismində “Volvo S80” və “Toyota Camry” markalı avtomobillər, tikinti materialları və məişət texnikası alıb.

İstintaq Komitəsi təqsirləndirilən şəxslərin yaşadıqları və iş yerlərində axtarış aparıb. Araşdırmalar davam etdirilir.