“Ukraynanı mübarizədə tək qoymaq doğru deyil. Bu ölkə siyasi oyunun qurbanıdır və amansız müharibə on minlərlə insanın həyatına son qoyulub. Hesab edirəm ki, hər kəs son proseslərdə Böyük Britaniyanın addımlarını dəstəkləməlidir. Fikrimcə, Britaniya humanist hərəkət edir. Digər tərəfdən, əgər Amerika müharibəni dayandırmaq istəyirsə və ya bunu bacarırsa, dayandırsın”.

Bunu Reyting.az-a Milli Məclisin deputatı Asim Mollazadə deyib.

ABŞ-nın Ukraynada atəşkəs elan etmək istəməsi fonunda Böyük Britaniyanın Ukraynaya dəstək verməsi və Rusiyaya qarşı müqavimət təşkil etmək imkanında olub-olmadığı suala cavabında A. Mollazadə bildirib ki, atəşkəsi deyil, ən əsası müharibəni dayandırmaq lazımdır. Onun fikrincə, müharibəni dayandırmaq kimi təşəbbüslər təqdirəlayiqdir, bir şərtlə ki, bu, sonradan daha böyük faciələrə yol açmasın. Yəni təhlükəsizlik məsələsi vacib amildir.

Mollazadə qeyd edib ki, bədnam Minsk qrupu ilə 30 ildir tanışıq və onların fəaliyyətinin mahiyyətini bilirik: “İllər əvvəl Ukrayna ilə bağlı da Minsk qrupu yaradılmış, razılaşma əldə olunmuş, atəşkəs razılaşdırılmışdı. Amma sonradan Ukraynaya genişmiqyaslı hücum oldu və hazırda müharibə davam edir”.

Deputat onu da xatırladıb ki, əgər söhbət Ukraynada sülh təkliflərindən gedirsə, Azərbaycana qardaş ölkə olan Türkiyə müharibə başlayandan sonra belə təşəbbüslə çıxış etmişdi. “Türkiyə israrla müharibənin dayandırılmasını istəyir və ciddi işlər aparır, hətta tərəflər arasında yaxınlaşma da müşahidə olunurdu”,- deyə Mollazadə əlavə edib.